O conselleiro de Sanidade, Antonio Gómez Caamaño, destacou o investimento da Xunta de case un millón de euros na transformación da terraza do Hospital Clínico Universitario de Santiago de Compostela (CHUS). A obra converterase nunha área de espera humanizada para os pacientes oncolóxicos e estará en servizo tras o Nadal.
Gómez Caamaño, acompañado polo xerente da área sanitaria, Anxo Facio, supervisou o avance dos traballos na nova zona de espera do hospital de día de oncohematoloxía. O obxectivo é ofrecer un espazo confortable e funcional para os case 200 pacientes diarios (uns 3.000 ao ano) que acoden a recibir tratamento, ademais dos seus familiares.
Con ese fin transformouse a terraza do hospital, para aproveitar este espazo e as súas vistas para “crear un lugar confortable para os pacientes e acompañantes”. As obras abarcan máis de 300 metros cadrados e están xa concluídas, pendentes unicamente da recepción e instalación do mobiliario nas próximas semanas. A sala foi pechada por completo para a súa correcta climatización e ampliou o número de prazas ata as 113.
O conselleiro resaltou que o proxecto tivo en conta a voz dos pacientes, xa que as liñas de traballo foron definidas tras unha reunión da Xerencia cos responsables de Oncoloxía e representantes dos propios pacientes, garantindo a incorporación das súas necesidades. Gómez Caamaño sinalou que a estancia media por paciente é dunhas tres horas, sendo “imprescindible transformar esta sala nun lugar máis funcional e cómodo, pensado para aliviar a carga emocional que supón un tratamento oncolóxico“.
