Compostela volverá ser o epicentro das protestas do profesorado galego a mediados de decembro. A CIG-Ensino, en coordinación co STEG, fixo pública a convocatoria de dúas xornadas de folga para os días 16 e 17 de decembro, unha chamada que chega, segundo as organizacións, tras meses nos que a Consellería de Educación “segue facendo oídos xordos ao clamor do persoal docente no curso máis conflitivo desde hai catro décadas”.
A mobilización abrangue todo o persoal docente dependente da Consellería de Educación, Ciencia, Universidades e FP, desde Infantil e Primaria até Secundaria, FP e os ensinos de réxime especial. As datas foron escollidas, sinala a CIG-Ensino, porque coinciden cos días de avaliación, sobre todo en Primaria e Secundaria, nun curso no que tamén se adiantan os peches de trimestre na Formación Profesional.
A central sindical destacou que estes dous paros se suman aos xa celebrados desde setembro, o que supón cinco xornadas de folga en apenas catro meses de curso, unha acumulación que, segundo o sindicato, evidencia “a intensidade dun conflito laboral sen precedentes desde os anos 80 no ensino público non universitario”.
O 17 de decembro, día da segunda folga, as protestas concentraranse en Santiago de Compostela, onde se organiza unha “gran manifestación” que terá como punto central o Parlamento de Galicia. A mobilización coincidirá co pleno no que o Parlamento debaterá e votará a aprobación definitiva dos orzamentos da Xunta para 2026, un contexto que os sindicatos consideran clave para visibilizar as súas reivindicacións.
A CIG-Ensino sostén que, se o proxecto orzamentario segue adiante tal e como está, “hai moi pouca marxe de mellora” respecto ás cuestións que o profesorado reclama: baixada de cocientes, recuperación da carga lectiva previa aos recortes e unha maior dotación de persoal nos centros para atender a diversidade. O sindicato denuncia que o número de docentes previsto para 2026 “é o mesmo que nos últimos catro anos”.
Por todo isto, a organización insta o conselleiro Román Rodríguez a abrir “negociacións inmediatas” cos sindicatos, lembrando que “si o fai o seu homólogo en Sanidade”, e reclama unha rectificación que permita “frear estas convocatorias” e afrontar “a grave situación que atravesan os centros educativos”.
