O Concello de Santiago impulsará nestas vacacións de Nadal unha nova edición do seu programa municipal de conciliación dirixido á mocidade, unha iniciativa que naceu como experiencia piloto no verán e que, segundo explicou a concelleira de Dereitos e Servizos Sociais, Promoción Económica e Xuventude, María Rozas, busca cubrir “unha necesidade recoñecida polas familias con fillos e fillas maiores de 12 anos”.
A responsable municipal subliñou que existe moi pouca oferta de conciliación pensada para adolescentes, a pesar de que “as familias seguen precisando alternativas durante os períodos non lectivos e a rapazada non é autónoma nin independente nesas idades”. Rozas destacou ademais que o campamento aposta por propostas de lecer realmente atractivas, deseñadas para un público de 12 a 27 anos, e que tamén promovan “espazos de socialización fronte ao uso excesivo das pantallas”.
O campamento desenvolverase durante o período de vacacións escolares do Nadal, será de balde e terá lugar no Monte do Gozo. O horario xeral irá de 09:00 a 14:30, con opción ampliada de 08:00 a 15:30 para aquelas familias que o precisen. A novidade máis destacada será a inclusión de dúas pernoitas voluntarias, os días 27–28 de decembro e 3–4 de xaneiro, unha petición realizada pola propia mocidade na edición estival. “Querían un campamento onde tamén se puidese durmir, e así o incorporamos”, explicou a concelleira.
OBRADOIROS DE ARTE, MÚSICA, FOTOGRAFÍA E ACTIVIDADES DE CONVIVENCIA
A coordinadora do programa, Nathalie Budiño, detallou que a proposta volverá pivotar arredor da creación artística. Haberá obradoiros de cerámica, ilustración, pintura, fotografía e autorretrato, ademais de actividades de ficción sonora, música, danza, teatro e improvisación. Tamén se incorporan xogos de mesa, actividades deportivas e propostas vinculadas ao medio ambiente.
Durante as pernoitas, a rapazada participará en dinámicas específicas, incluíndo un obradoiro de cociña, no que elaborarán a súa propia cea baixo supervisión profesional. Budiño salientou que o obxectivo é crear “espazos seguros nos que os mozos e mozas poidan expresarse e atopar un ambiente no que se sintan cómodos”.
O Concello traballa cun equipo formado por persoas con formación en ocio e tempo libre, ás que se suman profesionais especializados en distintas disciplinas artísticas.
UN CAMPAMENTO INCLUSIVO
O técnico municipal Manuel Fernández destacou a incorporación, por primeira vez, dunha reserva específica do 10% das prazas para participantes con necesidades de apoio, unha demanda trasladada por diversas familias. As persoas que formen parte do equipo contarán tamén con formación en dependencia e necesidades especiais, co fin de garantir un acompañamento adecuado.
Rozas subliñou que se trata dun “campamento inclusivo para todas as diversidades”, salientando que a porcentaxe reservada está por riba do habitual noutros programas semellantes. “Esta iniciativa cumpre os criterios dun campamento dirixido á mocidade desde unha perspectiva de conciliación, lecer e inclusión”, afirmou.
O programa ofrece 50 prazas destinadas a mozos e mozas empadroados en Santiago. O prazo de inscrición permanecerá aberto do 24 de novembro ao 12 de decembro, e a listaxe provisional publicarase o 15 de decembro. O formulario poderá descargarse na web municipal ou solicitarse por correo a través do Departamento de Mocidade.
