O Concello de Ames celebrou este martes un pleno extraordinario no que se aprobaron dous asuntos que marcaron a sesión: por unha banda, a renuncia de Carmen Porto Rey como concelleira de Planificación e Xestión Educativa e Mocidade; por outra, a aprobación unánime dun suplemento de crédito de 60.000 euros para impulsar unha nova edición dos Bonos Consuma, programa destinado a fortalecer o comercio local.
A dimisión de Carmen Porto centrou boa parte do pleno. Na súa intervención, explicou que a decisión chega tras “un proceso meditado” e agradeceu o apoio recibido durante os dous anos e medio nos que asumiu a responsabilidade das áreas de educación e mocidade. Porto fixo balance do traballo realizado, lembrando a actualización das ordenanzas dos servizos de conciliación e das escolas infantís municipais, a posta en marcha da Cociña central municipal, o reforzo do apoio aos centros educativos e o impulso de iniciativas como o Club da Mocidade, a mellora da Factoría de Biduído ou a creación do Consello Municipal da Xuventude. Admitiu tamén que houbo etapas “complexas”, citando momentos de tensión política e a xestión da alerta polo norovirus en Ventín.
A despedida contou co recoñecemento dos catro grupos con representación municipal. A voceira de Espazo Común, Luísa Feijóo, destacou “a valentía” da concelleira ao asumir responsabilidades “nunha das áreas máis sensibles”. Desde o BNG, Escarlata Pampín puxo en valor “o compromiso co concello e coa veciñanza”, mentres que a popular Oliva Agra definiu a etapa de Porto en tres ideas: “valentía, compromiso e dedicación”. Pola súa banda, o voceiro socialista, Víctor Fernández, subliñou que para o seu grupo é “un día triste”, pero recoñeceu que se trata dunha decisión “madura e responsable”. Pechou as intervencións o alcalde, Blas García, lembrando a incorporación de Porto ao equipo municipal e apelando á necesidade de “reflexionar colectivamente sobre os límites da acción política”.
No segundo punto da orde do día, a Corporación aprobou por unanimidade o suplemento de crédito 4/2025, que permitirá activar unha nova campaña dos Bonos Consuma a finais deste ano. O programa, que leva catro edicións consecutivas, busca dinamizar as vendas no comercio de proximidade coincidindo coa campaña de Nadal. Dos 60.000 euros consignados, 20.000 proceden de remanentes dunha convocatoria de subvencións e os 40.000 restantes do remanente de tesourería.
Segundo informou o goberno local, esta achega extraordinaria responde á necesidade de dotar de crédito específico un programa que non figuraba no orzamento prorrogado. O executivo argumenta que a iniciativa non pode atrasarse ata 2026, xa que a súa posta en marcha neste momento permitirá reforzar a actividade do pequeno comercio e evitar que o consumo se desvíe a outros municipios da área compostelá.
