O Partido Popular de Santiago fixo público este sábado un comunicado no que critica con dureza a situación do servizo municipal de bombeiros logo dun incendio no que, segundo a formación, só puido acudir unha dotación mínima. No texto, os populares agradecen a actuación dos profesionais do parque compostelán e salientan o apoio recibido dos corpos de Brión e Ordes, que se desprazaron para colaborar na intervención. Desde o PP aseguran que esta coordinación evitou “un escenario de consecuencias máis graves”.
A dirección local popular considera que o episodio evidencia unha “situación límite” no servizo de emerxencias de Santiago, e atribúe a responsabilidade ao goberno municipal formado por BNG e Compostela Aberta, co apoio do PSOE. A formación afirma que o operativo enviado ao lume era “insuficiente” e que esta carencia supón un risco tanto para o persoal como para a veciñanza.
Nun comunicado difundido tras o suceso, o PP cualifica a situación como “caótica” e solicita a dimisión inmediata da alcaldesa ‘Goretti Sanmartín’, á que sinalan como “máxima responsable” do estado do corpo de bombeiros. “O goberno ten a cidade nunha situación límite. ¿Que máis ten que pasar?”, preguntan, denunciando o que consideran unha falta de avances para reforzar o servizo.
Os populares engaden que farán responsable á rexedora “de calquera dano persoal que poida sufrir un cidadán ou bombeiro” en caso de novos incidentes, e acusan o executivo local de “neglixente inactividade” por non resolver un conflito laboral e operativo que o PP interpreta como solvible con “vontade política”.
