A pianista compostelá Isabel Dobarro sumou este xoves un novo fito á súa traxectoria ao obter o Latin Grammy ao Mellor Álbum de Música Clásica pola súa gravación Kaleidoscope (Naxos–Grand Piano). A cerimonia, celebrada nas Veigas, recoñeceu así un proxecto que afonda na visibilidade das creadoras na música contemporánea e que mantén unha forte ligazón con Santiago de Compostela, raíz biográfica da artista.
O disco, que reúne pezas de diferentes compositoras de diversos países, naceu coa intención de pór o foco no talento feminino, nunha liña que a intérprete leva anos reivindicando. No seu discurso, Dobarro lembrou que estas creadoras continúan a atopar dificultades para ocupar espazos de presenza no ámbito clásico e sinalou que o seu propósito foi darlles unha plataforma desde a interpretación e a gravación profesional.
Entre as obras incluídas destaca a composición final do álbum, Alalá dás paisaxes verticais, asinada pola tamén galega Carme Rodríguez, unha peza que dialoga co folclore galego e que, segundo explicou a pianista noutros encontros públicos, representa para ela unha forma de manter presente a paisaxe sonora da súa terra.
Visiblemente emocionada ao recoller o galardón, Dobarro dedicou o premio á súa familia. Lembrou “o apoio permanente” recibido ao longo da súa formación e evocou os primeiros concertos aos que asistiu no Auditorio de Galicia, espazo que situou como un dos puntos de partida da súa carreira musical. A artista tivo palabras especiais para o seu marido, a súa irmá e o seu sobriño, e fixo unha mención destacada aos seus pais, presentes no acto.
Con este recoñecemento internacional, Isabel Dobarro consolida unha traxectoria na que combina interpretación, investigación e activismo cultural, e sitúa de novo o talento musical compostelán nunha das principais plataformas da industria musical latinoamericana.
