A Universidade de Santiago de Compostela entregou os primeiros premios á divulgación científica, uns galardóns que nacen co obxectivo de recoñecer o labor do persoal investigador na comunicación social da ciencia. Na súa primeira edición, as distincións recaeron en Elena Vázquez Abal, profesora da Facultade de Matemáticas, e Manuel Gago Mariño, docente da Facultade de Ciencias da Comunicación. Cada premio está dotado con 2.500 euros e conta co apoio da Consellaría de Educación, Ciencia, Universidades e Formación Profesional da Xunta de Galicia e do xornal La Voz de Galicia.
Na modalidade que premia unha traxectoria consolidada de divulgación, o xurado destacou o traballo de Vázquez Abal, pola súa capacidade para facer comprensibles conceptos complexos da xeometría diferencial e por achegar as matemáticas á sociedade con claridade e rigor. O seu labor abrangue iniciativas tan diversas como ciclos de charlas en espazos informais, concursos audiovisuais ou proxectos educativos, entre eles o Consultorio VideoMatemático e MatHex. O comité valorou especialmente o impacto social e educativo das súas actividades, o seu compromiso coa igualdade de xénero e a defensa do galego como lingua de divulgación científica.
Pola súa banda, Manuel Gago Mariño foi recoñecido na categoría destinada a novas audiencias, que distingue o uso creativo das plataformas dixitais e formatos emerxentes. O xurado subliñou o carácter pioneiro e transversal da súa traxectoria, que combina historia, cultura e tecnoloxía para atraer públicos diversos. O profesor é coñecido polo seu blog ‘Capítulo Cero’, pioneiro na divulgación cultural e arqueolóxica galega, e por proxectos como o videoxogo ‘Xogos populares de Galicia’ ou experiencias de realidade virtual inmersiva aplicadas á historia. Ademais, salientouse o seu uso innovador de redes sociais, podcast e contido audiovisual, así como o deseño participativo e accesible das súas propostas.
