O Concello de Ames informou esta mañá da activación dun aviso de nivel laranxa por risco de avenidas, logo de que a estación da Rede de Aforos de Augas de Galicia no río Sar, en Bertamiráns, superase o limiar de prealerta. A situación podería derivar en enchido das canles e desbordamentos locais, segundo advertiu a Dirección Xeral de Emerxencias e Interior, que mantén activado o Plan Especial ante o risco de inundacións en Galicia (Inungal) en fase de preemerxencia.

O aviso chega nun contexto de intensas precipitacións e fortes ventos asociados á borrasca de grande impacto ‘Claudia’, que dende onte afecta á franxa atlántica galega. A AEMET prevé acumulacións de ata 80 milímetros en 12 horas e refachos de vento que poderán superar os 80 km/h, especialmente nas zonas costeiras e do suroeste da provincia da Coruña.

Como medida preventiva, o Concello de Ames xa decidira onte suspender todas as actividades deportivas ao aire libre en instalacións municipais. As autoridades locais reiteraron o chamamento á prudencia e lembran que, ante calquera incidencia relacionada co temporal, a veciñanza pode contactar coa Policía Local de Ames (619 767 575) ou coa Agrupación de Protección Civil (673 178 888).

A situación está a ser monitorizada de forma continua polos servizos de emerxencias, mentres se manteñen os avisos meteorolóxicos de nivel laranxa por choiva e amarelo por vento en boa parte de Galicia. O Concello mantén a súa comunicación activa a través das redes sociais e canles oficiais, co obxectivo de informar a cidadanía sobre a evolución do temporal e posibles novas medidas preventivas.