O portavoz do Grupo Municipal Socialista, Gumersindo Guinarte, denunciou a “falta de resposta e inacción” do Goberno local de Santiago ante a “ausencia de monitores e a cancelación de actividades” nos centros socioculturais municipais.
Segundo explicou o PSdeG nun comunicado, os usuarios destes espazos veñen trasladando desde hai meses as súas queixas pola redución e suspensión de actividades debido á falta de persoal. “A pesar das reiteradas advertencias, nada se moveu desde o Goberno local para dar unha solución definitiva”, indicou Guinarte.
O socialista sinalou que a problemática é especialmente grave nas parroquias rurais, onde “en moitos casos se cancelou por completo a programación dos centros socioculturais”. Para Guinarte, esta situación deriva do “incumprimento dos orzamentos por parte da empresa concesionaria do lote de animación sociocultural”, un conflito que, segundo lembrou, “non é novo e repítese desde hai meses”.
Ante esta situación, o portavoz do PSdeG instou ao executivo municipal a “actuar con urxencia” para garantir tanto o funcionamento normal dos centros como os dereitos laborais do persoal afectado.
