A alcaldesa de Santiago, Goretti Sanmartín, encabezou no Pazo de Raxoi a presentación da nova edición de ‘Reguéifate‘, acompañada do alcalde de Ames, Blas García; da concelleira de Normalización Lingüística de Arzúa, Lucía López Sobrado; da concelleira de Cultura de Carballo, Maruxa Suárez Cotelo, e do concelleiro de Normalización Lingüística de Pontevedra, Demetrio Gómez. A maiores, o Concello de Teo forma parte do programa, aínda que non asistiu á presentación pola coincidencia co San Martiño. O acto arrincou cunha pequena regueifa a cargo de José Teixeira, Xairo Delbou, Núria das Cruces e Manuel E. Pablo, a modo de convite á participación.
Sanmartín encadrou o proxecto como un valado interxeracional para incrementar o uso do galego entre a mocidade, creando espazos de encontro coa xente maior e co humor propio da tradición oral. “O que intenta é fomentar o uso do galego entre a xente máis nova, xerando esa ligazón coas persoas maiores e co patrimonio da poesía oral improvisada“, indicou, subliñando a boa resposta de público nas actividades celebradas nos distintos concellos.
No bloque formativo, Blas García anunciou que os obradoiros para profesorado arrancarán en Ames, no Pazo da Peregrina, en horario de 16:30 a 20:30. A docencia estará a cargo de Manolo Maceda, Xecho Xende, Lupe Blanco e Josinho da Teixeira. A inscrición permanece aberta ata o día 12, con 45 prazas para docentes de toda Galicia. “Buscamos promover expresión, empatía e traballo en equipo nas aulas para transmitir os valores da regueifa”, explicou o rexedor amesán, quen enmarcou a liña pedagóxica en principios de diversidade, cooperación, integración e feminismo.
Pola súa banda, Lucía López Sobrado detallou que entre finais de novembro e febreiro de 2026 se desenvolverán preto de 80 obradoiros escolares de improvisación oral para 5º e 6º de Primaria e ESO nos concellos participantes. O equipo formador inclúe, entre outras persoas, Josinho da Teixeira, Núria das Cruces, Xairo de Herbón, Manuel Hepardo, Lupe Blanco, O Rabelo e Cristian de Burela. “A regueifa é unha ferramenta de empoderamento lingüístico e de orgullo colectivo; o obxectivo é que as novas xeracións se sintan seguras da súa lingua e da creatividade que poden desenvolver en galego”, afirmou.
A dimensión participativa chega co Certame Regueifeiro, que Maruxa Suárez Cotelo cualificou como “unha das citas máis agardadas”. O ano pasado presentáronse preto dun cento de vídeos e a organización aspira a superalo. O chamamento abrangue ensino regrado e non regrado e tamén calquera persoa interesada. As condicións son sinxelas: mínimo dúas persoas regueifando en galego e un vídeo de ata 3 minutos. O prazo de envío ábrese o 12 de xaneiro e remata o 06 de marzo, coas bases e inscrición dispoñibles na web de ‘Reguéifate’.
No capítulo de recoñecementos, Demetrio Gómez avanzou unha dupla vía de premios (categoría xeral e escolar), con oito galardóns en cada unha. Ademais dos apartados a mellor cantada e mellor falada, incorporaranse distincións para regueifas máis brava, máis aguda, máis diversa, máis reivindicativa, máis inclusiva e outra de carácter máis lúdico. A gala de entrega celebrarase o 16 de abril ás 11:45 no Teatro Principal de Pontevedra. “Queremos gozar dunha cultura viva, moderna e plenamente inserida no mundo de hoxe”, afirmou.
A peche da rolda, a alcaldesa compostelá fixo un chamamento á participación de centros educativos e cidadanía para superar as cifras doutras edicións: “Calquera persoa que proba a regueifa quere continuar”. A responsable municipal apuntou, ademais, a vontade de sumar máis concellos a curto prazo, tras a incorporación de Arzúa nesta edición, para consolidar unha rede comarcal e galega de transmisión da regueifa como práctica cultural e como vehículo de uso social do galego.
