O Hostal dos Reis Católicos de Santiago conta desde hoxe cun punto violeta de información e apoio ás vítimas de violencia machista, dentro do plan que impulsa o Ministerio de Igualdade en colaboración con Paradores de Turismo de España. O obxectivo é estender esta rede de protección e sensibilización aos 13 paradores galegos e ao conxunto da rede estatal, convertendo espazos emblemáticos en lugares de atención e axuda.
Durante a presentación, o delegado do Goberno en Galicia, Pedro Blanco, subliñou que a posta en marcha deste servizo supón “un paso máis na construción dun país máis seguro, máis xusto e libre de machismo”. Segundo afirmou, trátase de transformar lugares singulares en referentes de igualdade e protección fronte á violencia de xénero.
Blanco estivo acompañado polo director do Hostal, Santiago Carreira, e polas traballadoras Ana Lago e Carmen Rodríguez, que recibiron formación específica para actuar ante posibles casos de violencia machista. O delegado destacou tamén o “compromiso” da presidenta de Paradores, Raquel Sánchez, coa implantación deste proxecto.
“Queremos contribuír activamente á concienciación e á sensibilización, transformando estes establecementos en espazos de atención, información e axuda para as vítimas”, afirmou Blanco, quen insistiu na importancia de que institucións e empresas públicas colaboren na loita contra a violencia de xénero.
Con esta actuación, o histórico edificio compostelán, símbolo da hospitalidade do Camiño de Santiago, súmase á rede estatal de puntos violetas, consolidando o seu papel como referente social e turístico tamén no ámbito da igualdade e a protección das mulleres.
