Enfermeiros e enfermeiras, baixo unha convocatoria do sindicato estatal (Satse), protestaron este venres fronte ao punto de atención continuada (PAC) de Santiago contra a decisión “unilateral” do Sergas de integrar a atención de sábados pola mañá na xornada do persoal de PAC. Presente no acto, a secretaria xeral de Satse en Galicia, Asunción Maus Gómez, recalcou que “o colmo” da situación é a decisión da Consellería de Sanidade de integrar esta atención no horario do persoal de PAC “sen contraprestación para os traballadores”.
Para Gómez, este feito “precariza [o traballo] aínda máis” porque “obriga” ao persoal a facer un número maior de sábados e impide unha “conciliación da vida familiar”. “Os fins de semana son momentos no que o resto do persoal concilia estar coa familia”, subliñou. En calquera caso, as queixas que se trasladaron durante a protesta tamén teñen que ver coas retribucións “mal ancoradas” e unha “serie de cuestións laborais” que, segundo subliñou Gómez, “hai que rectificar e mellorar”.
Durante a concentración, os asistentes corearon cánticos como “os PACs están en loita”, “non á precarización”, e “con esta dirección non hai negociación”. Ademais, reclaman que a Xunta non convoca mesas de negociación para abordar estas cuestiones pertinentes á categoría. Gómez lembrou que na folga de 2019 definiuse a creación dunha comisión de seguimento, un grupo que, segundo ela, non “se volveu reunir seis anos despois”.
