A alcaldesa de Santiago, Goretti Sanmartín, asegurou que o Concello continuará supervisando que se cumpran todos os requisitos legais para evitar molestias derivadas da actividade da sala de concertos Malatesta, situada na rúa de San Lourenzo. A mandataria respondeu así ás preguntas dos medios sobre as queixas veciñais pola recente reapertura do establecemento.
Sanmartín explicou que, segundo a normativa vixente, a apertura dun local deste tipo realízase mediante unha comunicación previa, polo que a responsabilidade municipal céntrase en verificar o cumprimento das garantías acústicas e do resto de condicións legais. “A xente para abrir determinado local o que ten que facer é mandar simplemente unha comunicación previa; nós o que faremos será esixir que se cumpran as garantías de que non haxa ruído exterior e de que se cumpre todo o que ten que ver coa normativa”, indicou.
A alcaldesa lembrou que o Goberno municipal xa actuou no pasado ante as denuncias do barrio, realizando inspeccións que concluíron que o local non reunía as condicións necesarias para permanecer aberto. “Ninguén pode dubidar da solidariedade municipal coas reclamacións veciñais sobre cuestións de ruído e dereito ao descanso”, afirmou.
Tras a súa nova apertura, Sanmartín insistiu en que o Concello manterá esa mesma “sensibilidade” e que continuará examinando o cumprimento da normativa, tanto no interior da sala como nos espazos exteriores, “que son os que moitas veces causan problemas”.
QUEIXAS DOS VECIÑOS DE SAN LOURENZO
Pola súa banda, o presidente da Asociación Veciñal Río Sarela, Jon Brokenbrow, manifestou o profundo malestar do barrio coa decisión de permitir a reapertura da sala. Segundo indicou, os residentes de San Lourenzo séntense “enganados polo Goberno local” e afrontan “outro golpe á súa vida familiar, á súa tranquilidade e ao seu dereito ao descanso”. Brokenbrow anunciou que a entidade veciñal presentará unha querela penal contra o Concello por “inacción e omisión de deber”, ao considerar que non se actuou con contundencia ante o que cualifican de “incumprimentos reiterados” da normativa acústica por parte do establecemento.
O representante veciñal sinalou tamén que, tras seis meses de peche, o barrio vivira “un tempo de calma que agora se rompe”, e que os veciños están “ao límite” ante o regreso das festas nocturnas. “Levamos moito tempo sufrindo esta situación, e a vía do diálogo está rota”, asegurou, subliñando que contan co apoio doutras asociacións compostelás, como Raigame e Fonseca. Brokenbrow lamentou que, malia as reunións mantidas co Goberno municipal, “dous días despois de recibir o seu apoio, atopámonos co anuncio da reapertura”, polo que decidiron poñer o asunto en mans da Xustiza.
