O Concello de Boqueixón deu comezo ás obras para a construción de dúas novas sendas peonís nas parroquias de Sergude e Lestedo, cun investimento global que supera os 435.000 euros. O obxectivo principal destas actuacións é mellorar a mobilidade, a seguridade e a accesibilidade da veciñanza nas contornas rurais do municipio.
Na parroquia de Sergude, a nova senda conectará a igrexa parroquial e as aldeas de Lamas e Deseiro de Abaixo co cruce da N-525, permitindo un tránsito máis seguro para os peóns e reducindo os riscos nunha zona de frecuente circulación. Ademais, o goberno local lembra que está previsto outro proxecto complementario: a construción dunha senda peonil entre Sergude e Rodiño, que será executada pola Xunta de Galicia. Este último proxecto, cun investimento estimado de case 750.000 euros, podería licitarse ao longo de 2026.
No caso da parroquia de Lestedo, a intervención abrangue o tramo que vai desde o cruce das rúas Mestre Manuel García e Pico Sacro ata o cruceiro, cun orzamento próximo aos 35.000 euros. A nova infraestrutura permitirá crear un primeiro itinerario seguro para os desprazamentos a pé desde o centro da vila ata o pavillón polideportivo municipal.
Este espazo deportivo tamén está a ser obxecto de melloras: o Concello investe outros 50.000 euros na renovación da súa eficiencia enerxética, co propósito de ofrecer un equipamento máis cómodo e sustentable para o uso veciñal.
Segundo o goberno municipal, estas actuacións enmarcanse nun plan máis amplo orientado a favorecer a mobilidade peonil e a cohesión territorial, con intervencións que contribúan a conectar os núcleos e reforzar a seguridade viaria en todo o termo municipal.
