O BNG de Teo impulsa este mércores 5 de novembro, ás 19:30, unha xornada formativa na Mediateca do Grilo centrada en visibilizar a menopausa desde diferentes perspectivas profesionais. O encontro, aberto ao público, pretende romper co silencio e os prexuízos que durante décadas rodearon esta etapa natural da vida das mulleres.
No acto participarán Iria Carreira, médica e deputada do BNG no Parlamento de Galicia; María José Carrete, matrona, e Iria Rei, fisioterapeuta. As tres abordarán a menopausa desde as súas áreas de coñecemento para ofrecer respostas, pautas e propostas que contribúan a un maior coñecemento social e institucional sobre o tema.
Segundo explicou Iria Carreira, “as mulleres temos sufrido invisibilización ao longo do tempo, tamén no que se refire á nosa saúde e ao noso benestar, e esta iniciativa quere contribuír a romper con esta situación nun tema que foi especialmente silenciado”. A deputada subliña que, ata o de agora, “a menopausa tense tratado como se fose unha alteración ou unha patoloxía, cando é unha parte máis da nosa vida que é preciso coñecer, falar dela e compartir experiencias”.
A xornada, organizada polo BNG de Teo, busca tamén reclamar maior atención das administracións e en particular da Xunta de Galicia, para que a saúde das mulleres neste período reciba o recoñecemento e os recursos necesarios. “Queremos sacar a menopausa ao espazo público e rachar dunha vez por todas coa invisibilización constante da nosa saúde”, engadiu Carreira.
