O goberno local de Santiago de Compostela mantivo este mércores un encontro con representantes das organizacións sindicais CCOO, UXT e CIG co obxectivo de abrir unha mesa de negociación na que abordar a situación laboral dos corpos de bombeiros e da policía local.
A proposta do executivo municipal chega nun contexto marcado pola falta de efectivos e polo retraso no pagamento das horas extra, que o Concello prevé abonar ao longo do mes de novembro. Mentres tanto, os traballadores veñen reforzando as quendas con horas complementarias para garantir a cobertura dos servizos, unha circunstancia que as centrais sindicais consideran insustentable a medio prazo.
As tres organizacións coinciden na necesidade de mellorar as condicións laborais e revisar os complementos específicos destes corpos de seguridade, aínda que con diferencias nas súas formulacións, especialmente no relativo ás compensacións económicas por xornada extraordinaria. Está previsto que bombeiros e policías locais celebren na noite deste mércores unha asemblea para analizar a proposta e decidir os seguintes pasos.
Durante a rolda de prensa posterior á Xunta de Goberno, a portavoz municipal Míriam Louzao asegurou que o executivo compostelán acudiu ao encontro “con ánimo de chegar a acordos xustos” e apelou á “responsabilidade” do corpo de bombeiros para que continúe prestando servizo “como ata agora” mentres avanzan as conversas.
Louzao respondeu tamén ás críticas do conselleiro de Presidencia, Diego Calvo, quen acusara o goberno local de “non traballar” para evitar que Santiago quede “sen bombeiros”. A portavoz replicou que o proceso depende actualmente do Consorcio Provincial de Extinción de Incendios, integrado pola Deputación da Coruña e a Xunta de Galicia, e non do Concello: “Neste momento está pendente dun trámite do consorcio, polo que o que dicían os señores Calvo e Rueda é incerto”.
A responsable municipal subliñou que o executivo compostelán mantén a súa vontade de diálogo e reclamou “respecto institucional” entre administracións. “Non imos entrar nese xogo de mentiras, pero tampouco podemos deixar sen resposta afirmacións falsas”, concluíu.
