O portavoz e líder do Partido Popular de Santiago, Borja Verea, cualificou este luns de “irresponsabilidade” a situación vivida na cidade pola inoperatividade do parque municipal de bombeiros, que, segundo lembrou, permaneceu pechado por primeira vez desde 1921, e pola presenza “dun só policía patrullando as rúas”.
Verea criticou con dureza ao Goberno local do BNG e Compostela Aberta, ao que acusou de “poñer na diana aos profesionais” e de non cumprir coas obrigas salariais. “Os bombeiros e a policía local non cobran as súas nóminas completas, porque levan case un ano sen recibir o pago das horas extra”, afirmou.
Durante a súa intervención, o líder popular preguntouse “que máis ten que pasar” para que o executivo municipal actúe, e sinalou directamente ao concelleiro responsable do servizo de emerxencias por “non atopar unha solución ante unha situación extremadamente grave”.
O portavoz do PP compostelán insistiu en que se trata dun caso de “neglixencia” por parte da alcaldesa Goretti Sanmartín, asegurando que “a súa indolencia está a poñer en risco a vida dos profesionais, dos bombeiros e da veciñanza”. Ademais, denunciou que “a cidade quedou sen policía local de patrulla, só con un axente na rúa”.
“Estamos ante un goberno que non é capaz de xestionar nin unha comunidade de veciños”, concluíu Verea, quen reclamou que a alcaldesa e o seu equipo “pidan perdón e marchen á casa porque lle están facendo moito dano a Santiago”.
