A situación de malestar e preocupación sanitaria que se viña vivindo na praza de Cervantes parece ter remitido esta fin de semana. O home sen fogar que permanecía dende hai meses na zona, moitas veces semiespido baixo os soportais e realizando as súas necesidades en público, abandonou o lugar o sábado pola tarde, segundo confirmaron varios residentes.
A presenza desta persoa, coñecida polos veciños e comerciantes da contorna, xerara numerosas queixas nas últimas semanas pola súa conduta e polo deterioro da convivencia. Algúns dos negocios próximos advertiran do risco sanitario e da afectación á imaxe da praza, un dos espazos máis emblemáticos da cidade.
“Vímolo marchar polo Preguntoiro abaixo con todas as súas cousas”, relatou unha veciña ao diario El Correo Gallego, quen explicou que no barrio se comentaba que o home “dixo que se ía de Santiago”. Outras versións apuntaban a que podería trasladarse temporalmente pola celebración da Carreira Pedestre, que tivo lugar este domingo.
Na mañá do domingo, a praza e os arredores presentaban xa un aspecto normalizado, sen rastro do home que permanecera durante meses no emprazamento. A súa marcha, aínda que non se coñecen os motivos exactos, foi recibida con alivio por parte da veciñanza, que levaba tempo solicitando a intervención das autoridades municipais.
