O Concello de Ames abriu este sábado, 25 de outubro, as portas da Cociña central da rede municipal de comedores escolares, en funcionamento desde o pasado 8 de setembro, coincidindo co inicio do curso. A visita contou coa participación do alcalde, Blas García, da concelleira de Planificación e Xestión Educativa, Carmen Porto, doutros concelleiros do grupo de goberno e de representantes dos grupos municipais do PP e do BNG, así como de director@s e representantes das ANPAS dos centros educativos CEIP A Maía, CEIP Agro do Muíño, CEIP de Barouta e da EEI Milladoiro.
A actividade realizouse nunha xornada sen actividade escolar para facilitar o acceso ás instalacións, e estivo guiada pola técnica municipal en nutrición, Rosana Martínez, e pola aparelladora municipal, Margarita Iglesias. Participaron tamén as directoras da EEI Milladoiro e do CEIP Agro do Muíño, Ángeles Ferrón Novais e María Carmen Liñares, ademais de representantes das ANPAS dos distintos colexios.
Durante a visita, o alcalde Blas García destacou que “a Cociña central é un proxecto pioneiro que reforza a aposta do Concello de Ames por un dos seus servizos estrela, a rede municipal de comedores escolares, xestionada directamente polo Concello desde 2005”. Engadiu que esta infraestrutura “permitirá cambiar o sistema de funcionamento dos servizos de conciliación”, co obxectivo de que tamén poida elaborar os menús da Escola de Verán.
Pola súa banda, a concelleira Carmen Porto explicou que a apertura deste sábado tivo como finalidade “dar a coñecer á comunidade educativa as novas instalacións e o proceso de elaboración dos menús, resolvendo dúbidas e conversando coas técnicas municipais encargadas da xestión do servizo”.
DÚAS ÁREAS PRINCIPAIS E MÁIS EFICIENCIA
A Cociña central de Ames, situada nunha superficie de 888 metros cadrados, conta con dúas áreas principais: unha zona de cociña e unha central de lavado, ademais de espazos para carga e descarga, vestiarios, almacén, oficinas e zona de frío. Este novo modelo permite centralizar a preparación do menú basal diario, o que supón unha maior eficiencia laboral fronte ao sistema anterior, no que o persoal estaba repartido entre as cociñas da EEI Milladoiro, CEIP Agro do Muíño e CEP de Ventín.
O investimento total ascendeu a 642.951,02 euros, distribuídos entre as obras da cociña (379.627,30 €), da central de lavado (176.527,70 €), a renovación do tellado (26.477,52 €) e a adquisición do túnel de lavado industrial (60.318,50 €). O equipamento principal, como fornos, campás extractoras e cámaras de frío, foi trasladado das antigas instalacións.
A Cociña central elabora cada día o menú basal que se serve nos comedores do CEP de Ventín, EEI do Milladoiro, CEIP de Barouta, CEIP da Maía, CEIP Agro do Muíño e das escolas unitarias de Covas e Ortoño, o que supón arredor de 1.450 comensais.
A maiores, mantense operativa a cociña da EEI do Milladoiro, encargada dos menús específicos de tratamento nutricional para alumnado con alergias, intolerancias ou necesidades dietéticas especiais. Actualmente, 143 nenos e nenas contan con este tipo de menús adaptados.
O equipo humano do servizo está composto por 24 persoas, todas elas persoal municipal: 19 traballadoras de cociña, unha persoa coordinadora e tres profesionais na cociña da EEI Milladoiro, ademais da técnica en nutrición responsable da planificación dos menús.
AMPLIACIÓN FUTURA
O Goberno local prevé ampliar as instalacións para habilitar unha segunda cociña independente dedicada exclusivamente á elaboración dos menús de tratamento nutricional, co fin de concentrar toda a actividade no mesmo edificio e mellorar as condicións de traballo e seguridade alimentaria.
Con esta infraestrutura, o Concello de Ames consolida o seu modelo de xestión pública directa dos comedores escolares, unha das redes máis amplas de Galicia, e reforza a súa aposta por unha alimentación saudable, sostible e de proximidade para o alumnado do municipio.
