O emblemático local ‘O Filandón’, situado na rúa da Acibechería, acolleu esta tarde un emotivo acto de lembranza a María Isabel Rodríguez Calveiro, coñecida por todos como ‘Isa do Filandón’, coincidindo coa data na que cumpriría 56 anos. Un ano despois do seu falecemento, familiares, amizades e clientes reuníronse no espazo que ela rexentou dende o ano 2000 para inaugurar a exposición ‘Amig@s’, unha homenaxe colectiva á súa vida e á pegada que deixou na cidade.
A mostra reúne obras de sete artistas que, a través de distintas disciplinas, quixeron renderlle tributo á hostaleira compostelá. Paco participa con pezas de escultura e pintura en técnica mixta; Auré Reing presenta as acuarelas Raíces entre fíos, Notas de recordo e Rezar en tempos baleiros; Christian José-Fdez. exhibe catro retratos en grafito; Ana Muñiz achega Fiestra, unha creación en técnica mixta con luz, madeira e papel; Eva de Novo amosa dúas acuarelas; e Zamo Tamay contribúe con Retorno —grafito e tinta chinesa sobre papel— e a viñeta orixinal Bufonadas de Zamora, publicada en 1994 no xornal colombiano El País – Cali.
O acto contou tamén cunha intervención literaria de Xangalban, dono de María Castaña, que puxo voz ás lembranzas compartidas, e coa actuación musical do cantautor Tato López, da Casa da Trova, quen interpretou varias pezas nun ambiente cheo de emoción e agradecemento.
Os asistentes celebraron a vida e o carácter entrañable de Isa, recordada pola súa retranca e pola hospitalidade coa que recibía a quen cruzaba a porta do Filandón.
OUTROS ACTOS DE LEMBRANZA
Esta homenaxe marca o inicio dunha fin de semana de lembranzas, que continuará mañá, sábado 25 de outubro, coa misa polo seu cabodano na igrexa de San Martiño de Dornelas (Silleda), e o vindeiro martes 28, cunha nova celebración en San Bieito do Campo, en Compostela, para seguir compartindo recordos e manter viva a súa presenza entre quen a quixo e admirou.
