A Xunta de Galicia destina este ano 1,3 millóns de euros á mellora de infraestruturas educativas no concello de Teo, a través de dúas actuacións centradas nos colexios A Igrexa-Calo e Plurilingüe dos Tilos. Así o destacou esta tarde o conselleiro de Educación, Ciencia, Universidades e FP, Román Rodríguez, durante unha visita ao centro de Calo para supervisar a marcha das obras de rehabilitación integral, orzadas en 925.000 euros.
Segundo explicou o conselleiro, os traballos en A Igrexa-Calo están xa executados nun 70%, e inclúen a colocación de illamento térmico polo exterior (SATE), a substitución de 1.068 metros cadrados de cuberta por paneis sándwich illantes, a instalación de 92 fiestras e cinco portas con dobre acristalamento, e o reemprazo de 316 luminarias por luces LED de baixo consumo. Tamén se está a realizar unha optimización de espazos, coa renovación de canlóns e baixantes, a colocación de falsos teitos con protección acústica, a substitución dos mesados da cociña por aceiro inoxidable, a renovación do chan da escaleira principal con pavimento antiescorregadizo e a instalación de nova sinaléctica.
O obxectivo, segundo subliñou Rodríguez, é “dar un novo pulo a este centro educativo, que presentaba as problemáticas clásicas dun edificio con máis de 50 anos de antigüidade”, e “incrementar o confort diario para toda a comunidade educativa, tanto neste colexio como no dos Tilos”.
Precisamente, no CPI Plurilingüe dos Tilos xa rematou a actuación de substitución da cuberta, cun investimento de 375.000 euros.
Ambas intervencións enmárcanse no Plan de nova arquitectura pedagóxica, unha das principais liñas de actuación da Consellería de Educación, que aposta pola mellora da eficiencia enerxética e a redución do consumo eléctrico e térmico nos centros públicos galegos.
