O alumnado do IES Antonio Fraguas protagonizou este venres unha nova edición do Día de García Lorca en Galicia, unha celebración que encheu a Alameda de Santiago de música, danza e teatro. O acto tivo lugar xunto á escultura do poeta granadino, erixida en 2020 polo Concello, e contou coa presenza da alcaldesa Goretti Sanmartín e da concelleira Míriam Louzao.
O impulsor da homenaxe, o escritor Henrique Alvarellos, explicou que esta é “a oitava vez que se celebra o Día de García Lorca en Galicia”, unha cita que se realiza cada 25 de outubro, data na que o autor chegou por primeira vez á comunidade. O obxectivo, sinalou, é lembrar a “inmersión profunda” que Lorca mantivo coa cultura galega desde aquela primeira viaxe de 1916 e os seus posteriores regresos, especialmente o de 1932.
Alvarellos subliñou tamén a identificación do poeta con Galicia e a súa admiración por Rosalía de Castro, en quen se inspirou para escribir parte da súa obra en galego. “Lorca sentía Galicia como algo propio”, indicou o escritor.
Durante a xornada, o alumnado de bacharelato de Artes Escénicas interpretou diferentes pezas de teatro, danza e música inspiradas nos textos do autor de Bodas de sangue e Poeta en Nova York. As actuacións desenvolvéronse nun escenario improvisado arredor da estatua, convertendo a Alameda nun espazo artístico aberto.
A alcaldesa Goretti Sanmartín destacou o valor da iniciativa e a vixencia do legado de Lorca: “É unha figura especial, singular, que queremos lembrar neste 90 aniversario da publicación dos seus poemas en galego”. A rexedora lembrou tamén que o escritor decidiu empregar a lingua galega tras a súa estadía en Compostela, un vínculo que esta celebración quere manter vivo ano tras ano.
