A alcaldesa de Santiago, Goretti Sanmartín, respondeu este venres ás críticas do Partido Popular pola vertedura de augas residuais ao río Sar, derivada das obras da nova depuradora da Silvouta, e afirmou que o Concello actuou “desde o primeiro momento” en coordinación coas administracións competentes.
“Estivemos desde o primeiro momento facendo un seguimento e, no momento en que tivemos un informe da comisión de seguimento, decidimos trasladar toda a información tamén aos concellos veciños”, explicou a rexedora, que fixo estas declaracións durante a súa asistencia á lectura pública dos nomes de nenos palestinos falecidos en Gaza, na Praza do Toural.
Sanmartín cualificou de “estrañas” e “non intelixibles” as declaracións dos populares, e atribuíu a situación á “chegada tarde” dunha infraestrutura que era necesaria e cuxa demora considera responsabilidade do PP.
A alcaldesa salientou que o Concello mantivo contacto permanente con Acuaes e Augas de Galicia, destacando que a relación con estas entidades é “moi boa” e que o goberno local “actuou en todo momento dentro das súas competencias e en coordinación coas administracións implicadas”.
En clave máis irónica, Sanmartín tamén respondeu ás palabras do concelleiro popular Adrián Vila, quen lle pedira que “recitase o cronograma da súa inacción”. “Creo que o concelleiro do Partido Popular faría ben en ler un pouco máis de poesía, porque o do coidado e a limpeza dos ríos, dende logo, non se lles dá moi ben”, comentou a alcaldesa compostelá.
