O Concello de Santiago levará ao Pleno a aprobación definitiva da modificación puntual do PXOM no ámbito do Ensanche, a primeira revisión de usos que sae adiante desde o ano 2003. A actuación ten como principais obxectivos protexer o comercio de proximidade, priorizar o uso residencial e incorporar vivenda protexida no centro da cidade.
Segundo explicou o concelleiro de Urbanismo, Iago Lestegás, o plan vixente permite un máximo de 4.500 m² de uso residencial, mentres que a nova ordenación incrementa esa superficie ata os 16.300 m², reservando polo menos o 45% para vivenda protexida, excluídas as plantas baixas. Ademais, elimínase o uso hoteleiro, que podía alcanzar ata 7.000 m², para consolidar o carácter residencial da zona.
Outro dos cambios significativos é a redefinición da volumetría, coa redución da edificabilidade total de 23.500 a 19.000 m² construídos de uso lucrativo. Mantéñense, non obstante, as cesións obrigatorias de solo público establecidas en 2005: un equipamento de 900 m² e un espazo libre de 1.395 m². Lestegás destacou que o novo deseño configura un espazo público de calidade orientado ao sudoeste, cara á rúa de San Pedro de Mezonzo, con acceso aberto desde República Arxentina.
No proceso de exposición pública presentáronse tres alegacións, principalmente de comunidades de propietarios da contorna. Tras o seu estudo, o Concello decidiu ampliar o recuamento do primeiro ático de 1 a 2,5 metros nas zonas máis próximas aos edificios veciños, mellorando a integración da nova edificación co tecido urbano existente.
A memoria xustificativa do proxecto garante condicións de habitabilidade e sustentabilidade, incorporando sistemas de drenaxe urbana sostible, pavimentos permeables, arborado e criterios de accesibilidade universal e perspectiva de xénero no deseño dos espazos públicos. A urbanización deberá executala a propietaria dos terreos de forma simultánea á construción dos edificios.
A proposta contou coa conformidade da Sareb, titular da parcela, que confirmou por escrito á alcaldesa Goretti Sanmartín o seu apoio á modificación. En xuño, tras unha reunión entre Sanmartín e a ministra de Vivenda, Isabel Rodríguez, o Goberno anunciou a incorporación do terreo á nova Empresa Pública de Vivenda do Estado, dentro do proceso de traspaso de activos da Sareb.
NOVO EDIFICIO PARA O IDIS NA CHOPUANA
Na mesma sesión plenaria, o goberno municipal someterá tamén á aprobación definitiva o Plan Especial de Infraestruturas e Dotacións (PEID) que regula a construción do novo edificio do Instituto de Investigación Sanitaria (IDIS) na Choupana. O ámbito, de 5.817 m², está cualificado como equipamento universitario e inclúe unha parcela principal de 4.278 m² propiedade da Compañía de Xesús, que o IDIS se compromete a adquirir para incorporala ao dominio público.
Esta actuación permitirá dotar o complexo hospitalario compostelán dun novo espazo de investigación, favorecendo a coordinación entre a USC, o Sergas e os grupos científicos asociados ao instituto.
