O presidente do Partido Popular de Santiago, Borja Verea, cualificou hoxe como “unha das achegas máis importantes para Santiago por parte do Goberno galego” o investimento de 82 millóns de euros na creación da Fábrica Europea de Intelixencia Artificial (IA), que se instalará na capital galega. O proxecto, denominado ‘1HealthAI’, centrará a súa actividade na investigación en saúde e situará a cidade “na elite europea neste ámbito”.
Segundo explicou Verea, esta será unha das seis factorías europeas concedidas recentemente pola Unión Europea, das que “ata o de agora só existía unha en España e trece en todo o continente”. O dirixente popular subliñou que o proxecto “permitirá acelerar a investigación e a innovación, especialmente nos campos da biotecnoloxía e da saúde”, grazas á incorporación dun supercomputador especializado en IA e dunha plataforma experimental optimizada para este tipo de tecnoloxías.
A fábrica ofrecerá servizos de apoio gratuítos a empresas e centros de investigación e buscará fomentar a creación de startups, o desenvolvemento empresarial, a captación de talento e a xeración de emprego cualificado. Entre os ámbitos de actuación previstos inclúense a medicina personalizada, o envellecemento saudable, a biotecnoloxía azul, a xestión dos recursos mariños, a agricultura, a gandaría, o sector forestal, a bioenerxía e a economía circular, entre outros.
Ademais, Verea destacou o investimento de 56 millóns de euros nas novas instalacións do Centro de Supercomputación de Galicia (Cesga), que se construirán no polígono da Sionlla e estarán rematadas no verán de 2026. Trátase, segundo precisou, do primeiro proxecto estratéxico de investigación pública de Galicia, recoñecido pola Lei de Medidas Fiscais e Administrativas da Xunta, o que permitirá “axilizar a tramitación e consolidar o liderado internacional de Santiago en supercomputación e I+D+i”.
“Con estas infraestruturas de vangarda, a cidade atraerá novos fondos, investigadores e investimentos internacionais, fortalecendo o seu papel como motor da innovación galega”, afirmou o líder popular.
Por último, Verea celebrou o aumento da achega ao Estatuto da Capitalidade, que nos orzamentos autonómicos pasa de 2,4 a 3 millóns de euros, un incremento do 25 % en dous anos. O portavoz compostelán sinalou que esta suba “é unha mostra do compromiso da Xunta coa cidade” e que “recoñece a Santiago non só como capital legal, senón tamén como capital sentimental de todos os galegos”.
“Sabemos que toda cantidade nunca será suficiente, pero serán os composteláns quen decidan quen está a conseguir avances e quen se dedica ás liortas inútiles”, concluíu Verea.
