Decenas de persoas participaron nunha protesta este luns, no Aeroporto de Santiago-Rosalía de Castro, contra o Expediente de Regulación de Emprego (ERE) anunciado hai un mes por Ryanair. Por iso, traballadores de Ryanair, apoiados por entidades sindicais, políticos e empregados doutros servizos do aeroporto organizaron unha folga que derivou nunha marcha polas instalacións da terminal. Durante a marcha, os asistentes clamaron polo traballo dos empregados da empresa coreando cánticos como ‘co noso traballo non se xoga’, ‘non ao ERE de Ryanair’ e ‘estamos en folga’. A manifestación paralizou, por un momento, o servizo de ‘check-in’ no mostrador de Ryanair.
REUNIÓN COA EMPRESA TERMINOU SEN ACORDO
O delegado de Comisión e presidente do Comité de Ryanair, Alberto Couceiro, indicou que unha reunión mantida con representantes da compañía o pasado venres para abordar o tema do ERE, finalizo en desacordo. Así mesmo, Couceiro cualificou de “irrisoria” a proposta presentada por Ryanair na devandita reunión. “Eles queríannos dar 30 días por despedimentos, con 15 mensualidades. Cremos que é moi pouco xa que a empresa Ryanair estivo este último ano rexistrando marcas de beneficios”, detallou.
Por outra banda, Couceiro incidiu en que a empresa non está disposta a negociar un ERTE e “só pensa no ERE”. “Extinguir os contratos da xente máis antiga, volver contratar, despois, xente eventual, con menos horas e contratos máis precarios”, denunciou. Respecto da xornada de folga deste luns, o representante dos traballadores celebrou o apoio ao movemento ao mesmo tempo que recalcou que non houbo incidencias nos voos porque a empresa fixou uns servizos mínimos de “case 100 %”. En calquera caso, o seguinte paso, segundo Couceiro, será denunciar e tentar impugnar o ERE na Audiencia Nacional.
ERE “FRAUDULENTO”
Pola súa banda, a delegada da Confederación Intersindical Galega (CIG) e membro do Comité de Ryanair, Sofía Miranda, afirmou que desde o sindicato “teñen claro que este é un ERE fraudulento”. “Non estamos dispostos a perder os postos de traballo e reclamamos a reincorporación dos traballadores”, recalcou. A representante sindical subliñou que, de forma unilateral, Ryanair finalizou as negociacións coa proposta que “non se vai a aceptar”. “Estamos á espera da Audiencia Nacional. O que queremos é que se volva atrás con este ERE que, temos clarísimo, é fraudulento”, recalcou. Segundo Miranda, a proposta de Ryanair é quedar cun 15 % ou 20 % dos 100 traballadores que ten a compañía en terra. “É irrisorio porque sabemos que xa, na tempada de verán, vai haber máis voos, que xa non están cubertos co persoal necesario”, insiste.
PREOCUPACIÓN NO CONCELLO
A primeira tenente de alcaldesa do concello de Santiago, María Rozas, tamén acudiu á protesta onde reforzou a preocupación do consistorio coa situación do aeroporto e do futuro laboral dos traballadores de Ryanair. Así mesmo, a primeira tenente de alcaldesa lembrou que a terminal é unha “estrutura clave” para a cidade e que xera moitos postos de traballo directos e indirectos, ademais de permitir unha “conectividade” a nivel Santiago e galego.
“Por iso, apoiamos as demandas dos traballadores e das traballadoras de Ryanair. Por iso, hoxe estamos aquí, en apoio solidariedade da súa situación ante este anuncio de Ryanair”, salientou Rozas. Neste sentido, o secretario xeral de Movemento Sumar Galicia, Paulo Carlos López, criticou que o ERE presentado por Ryanair é unha “auténtica vergoña”. “Non foi negociado coa representación sindical e constitúe un ataque directo aos dereitos das traballadoras e traballadores”, recalcou.
