Este sábado, 27 de abril, o Museo do Pobo Galego acolle a décimo segunda edición do evento ‘A Voltas co Baile‘, unha iniciativa que este ano centra a súa atención na perspectiva de xénero e queer aplicada ao baile tradicional. Con inscricións xa pechadas, a xornada promete ser un punto de encontro para a reflexión e o debate sobre o papel que o baile xoga como ferramenta de socialización e expresión cultural.
Pola mañá, Bàrbara Duran Bordoy, doutora en Historia da Arte e Musicoloxía, guiará aos participantes nunha análise das danzas tradicionais contemporáneas nas Illas Baleares, profundando na súa evolución e o impacto cultural actual.
Na sesión de tarde, a profesora Aida Mariño Ardura, especialista en baile con perspectiva feminista e queer, centrarase na rexión asturiana coa charla ‘O control dos corpos no baile tradicional asturiano: alternativas desde unha perspectiva tradicuir’. Este segmento da xornada explorará como os estereotipos de xénero poden ser desafiados a través do baile, ofrecendo unha nova mirada sobre as tradicións establecidas.
Este encontro anual no Museo do Pobo Galego serve como plataforma para revisar e reinterpretar o legado cultural das danzas tradicionais, inseríndoas nun contexto máis amplo de debates sociais e culturais contemporáneos. Con esta edición, o museo continúa o seu compromiso de ser un espazo de aprendizaxe e intercambio cultural que respecta e valora a diversidade e a inclusión.
