O presidente do Partido Popular de Santiago, Borja Verea, acusou este venres ao goberno municipal de BNG e Compostela Aberta de “non saber ou non querer” afrontar o problema do senfogarismo e os episodios de inseguridadeque, segundo sinalou, “se están multiplicando nas rúas da cidade”.
Verea fixo estas declaracións tras a visita dos concelleiros populares Yolanda Otero e José Ramón de la Fuente á praza de Cervantes, nun contexto que, dixo, “reflicte o cansazo da cidadanía ante a crecente sensación de inseguridade, as pelexas no Ensanche, os narcopisos ou o aumento das persoas sen teito”. “Cada semana hai máis incidentes e non se fai absolutamente nada”, afirmou, asegurando que a situación é perceptible tamén en zonas como a rúa do Franco, Correos ou o Toural.
O portavoz popular insistiu en que o Concello “dispón de instrumentos sociais, sanitarios, de seguridade e xudiciais para actuar, pero non os emprega”, e advertiu de que “cando o senfogarismo deriva en actos violentos, xa non é só un problema de servizos sociais, senón tamén de convivencia”. Por iso, apelou a “escoitar os comercios e os veciños que teñen que convivir con estas situacións”.
Para Verea, “non ter escrúpulos é deixar a persoas vulnerables ou non vulnerables na rúa sen saída”, pero tamén “bloquear vivenda pública por intereses partidistas, consentir a situación do Refuxio de Bando ou os vertidos no Sar”. Engadiu que o PP seguirá denunciando publicamente estes asuntos “no lexítimo exercicio da súa responsabilidade”, aínda que non compartan a información que o goberno lles facilita.
Entre as medidas propostas, o líder popular reclamou un plan plurianual para contratar 100 novos policías locais, co obxectivo de reforzar a vixilancia no casco histórico e no conxunto da cidade, e acadar así un corpo duns 220 axentes, acorde coa poboación real e flotante de Compostela. Ademais, pediu activar as cámaras de videovixilancia, instalar novos dispositivos e mellorar a iluminación pública, que cualificou de “claramente insuficiente”.
Verea concluíu reclamando unha resposta integral que combine intervención social, sanitaria e xudicial, pero tamén maior presenza policial, para garantir “a convivencia e a seguridade” en Santiago.
