A alcaldesa de Santiago, Goretti Sanmartín, participou este venres na entrega dos Premios COGAMI 2025, un acto no que salientou a importancia de entender a inclusión “como un proceso colectivo e sostido no tempo”. Sanmartín, que entregou o recoñecemento ao Labor Empresarial á compañía Vegalsa-Eroski, afirmou que “a inclusión non se improvisa: constrúese, invístese, acompáñase”, e puxo en valor a traxectoria da Confederación Galega de Persoas con Discapacidade (COGAMI), “un movemento colectivo que puxo no centro a quen durante anos quedou á marxe”.
A rexedora compostelá apelou tamén á necesidade de “continuar reescribindo o guión social para que ningunha persoa teña que pedir permiso para estar”, e destacou o papel transformador da entidade ao longo das súas tres décadas e media de historia: “Non hai mirada máis poderosa que a que se transforma. E iso é o que fixo COGAMI nestes 35 anos: cambiar a forma de mirar, de entender, de relacionarnos coas diferenzas, coas capacidades diversas, coas vidas plenas máis aló do estereotipo”.
Nesta edición, os Premios COGAMI 2025 recoñeceron o Concello de Carballo na categoría de Iniciativa Institucional; Vegalsa-Eroski, polo Labor Empresarial; o investigador Ángel Carracedo, pola súa Traxectoria Persoal; e, de maneira honorífica e póstuma, a José Luis Costoya, histórico activista na defensa dos dereitos das persoas con discapacidade.
O acto, conducido polo humorista Roberto Vilar e a locutora Eva Millán, contou con actuacións musicais e escénicasprotagonizadas por persoas usuarias dos centros de COGAMI en Mos e da asociación AMBAR de Ribeira, así como co acompañamento musical do trío de jazz formado por Kim García, Jacobo de Miguel e Noli Torres, xunto coa voz de Carmen Rey.
