O Goberno galego enviou este ano case 250 actas de infracción aos concellos por servizos prestados no ámbito urbano por vehículos VTC en Galicia, a maioría a Santiago de Compostela (116) e A Coruña (112), pero tamén 17 a Vigo e dous a Culleredo.
Así o trasladou a Consellería de Presidencia nun comunicado no que informa tamén o envío dunha comunicación ás empresas titulares de VTC, e ás plataformas de intermediación entre as persoas usuarias e as titulares de autorizacións VTC que operan actualmente en Galicia (Uber, Bolt e Cabify), co obxectivo de lembrarlles os deberes legais para prestar o servizo, que pode realizarse en todo o territorio galego pero sempre entre municipios.
Así, incídese en que non poden ter publicidade nin signos externos identificativos e en que deben levar a bordo unha copia do correspondente contrato, ou dispor dos medios que permitan acreditalo. No contrato deben figurar, entre outros, os datos de identificación da persoa que o subscribe e do vehículo, o número de autorización de arrendamento do mesmo; así como o lugar, día e hora de comezo do servizo, a súa duración e o prezo ou os criterios obxectivos para calculalo.
A normativa establece tamén o deber da remisión da información do servizo prestado ao Rexistro de Comunicacións de Servizos de Arrendamento de Vehículos con Condutor (RCTV), tanto do contrato como do inicio do servizo, e que os servizos deben contratarse cunha antelación mínima de 15 minutos á realización.
A Xunta recalca que ten competencia para “controlar e sancionar” os servizos interurbanos que detecte dentro da comunidade autónoma en relación cos requisitos e deberes recolleitos na Lei de transporte en vehículos de turismo e normativa autonómica de desenvolvemento, así como os recolleitos na normativa estatal de aplicación, e así o fai en todos os casos nos que se detecta unha infracción.
