A alcaldesa de Santiago de Compostela, Goretti Sanmartín, reclamou este xoves á Xunta de Galicia que as parcelas cedidas polo Concello para a construción de vivenda pública se destinen en exclusiva ao aluguer e non á venda. A rexedora lembrou que o goberno local xa entregou tres parcelas e ofreceu outras dúas, pero subliñou que “a vivenda de promoción pública debe manter a titularidade pública unha vez construída”.
“Cremos que é fundamental porque, ao final, se se fai unha vivenda pública que se pode vender, deixa de ser pública aínda que se venda a prezo taxado”, afirmou Sanmartín durante unha rolda de prensa. A alcaldesa destacou que das tres primeiras parcelas cedidas, con capacidade para 75 vivendas, non se respectou esta condición, polo que insistiu en priorizar o réxime de aluguer como vía para atender ás 600 persoas inscritas no rexistro único de demandantes de vivenda pública na cidade.
O Concello propuxo, ademais, que a Xunta complemente as novas cesións cun programa autonómico de adquisición e rehabilitación de inmobles destinado tamén a vivenda pública en aluguer, co obxectivo de frear a perda de patrimonio habitacional. “Está ben que se fagan novas vivendas, pero tamén é imperante que se aposte pola rehabilitación”, engadiu a alcaldesa.
A proposta municipal chega despois dunha carta da conselleira de Vivenda e Planificación de Infraestruturas, María Martínez Allegue, na que a Xunta se interesaba polas parcelas UER5 do SUNP-5 (A Muíña) e PR4 do SUNP-4 (As Cancelas), que permitirían construír 62 e 18 vivendas, respectivamente. Allegue respondeu pedindo que o Concello ceda gratuitamente todas as parcelas “sen condicións”.
Sanmartín considera, con todo, que a etapa actual de elaboración dos orzamentos autonómicos de 2026 é o momento idóneo para que a Xunta incremente o investimento en vivenda pública e rehabilitación en Santiago, atendendo á demanda crecente e garantindo que o patrimonio construído permaneza no dominio público.
