UCIN Galicia fixo público o seu rexeitamento frontal á proposta da Xunta de Galicia para eliminar ou reducir de forma substancial as liñas de autobús entre Santiago de Compostela e a comarca do Barbanza, unha medida que —segundo sinalan— “profundará na marxinación do rural e limitará o acceso a servizos básicos de milleiros de galegos e galegas”.
Segundo os datos difundidos pola formación, a reestruturación do servizo afectaría directamente ás parroquias de Araño, Leiro, Isorna e Asados, no concello de Rianxo, que perderían a conexión directa coa capital galega, mentres que noutras zonas o número de frecuencias se reduciría máis dun 80 %. Para UCIN, isto supón deixar “sen alternativas reais de mobilidade” a persoas maiores, estudantes e traballadores que dependen do transporte público para desprazarse.
O coordinador de UCIN Galicia, José Luis Calo, cualificou a proposta de “inadmisible” e advertiu de que o partido “non permitirá que se consolide este recorte”. “Esta decisión non é unha reorganización, é unha amputación do transporte público no rural galego. Estanse a condenar parroquias enteiras ao illamento”, declarou. Calo engadiu que UCIN Galicia está disposta a liderar mobilizacións se o proxecto non se retira.
Entre as súas demandas á Xunta, o partido reclama a retirada inmediata do plan, a creación de mesas de diálogo cos concellos e a veciñanza, e a elaboración dun plan de mobilidade inclusivo e adaptado ao rural galego, con máis liñas e frecuencias nos núcleos periféricos.
A formación tamén manifestou o seu apoio ás plataformas veciñais que se están a mobilizar contra a medida, como a Asociación Leoira de Rianxo, promotora dunha recollida de sinaturas para frear a perda de servizos. “Galicia non se defende dende un despacho en San Caetano, deféndese na estrada, nos autobuses, nos colexios e nos hospitais. E alí é onde estará UCIN Galicia”, concluíu Calo.
