O presidente do Partido Popular de Santiago, Borja Verea, asegurou este xoves que está “convencido de que o Goberno galego terá unha especial sensibilidade” co Estatuto da Capitalidade nos orzamentos autonómicos de 2026. O tamén deputado no Parlamento de Galicia explicou que trasladou esta petición ao conselleiro de Facenda, co obxectivo de que a Xunta “marque a diferenza na cidade fronte a un goberno local paralizado e superado”.
Verea lembrou que o pasado ano o Estatuto da Capitalidade experimentou “a maior suba dos últimos quince anos”, cun incremento superior ao do propio orzamento autonómico. Nesa liña, reivindicou o compromiso do Executivo presidido por Alfonso Rueda coa cidade de Santiago, que considera “non só unha capitalidade legal, senón tamén sentimental, pola súa relevancia simbólica como cidade de todos os galegos”.
O líder popular compostelán acusou ao goberno municipal de BNG e CA de realizar un “mercadeo de cifras irresponsable” e de fomentar “a bronca pola bronca”. Ademais, apuntou que nas últimas semanas “quedou demostrado que son incapaces de ceder terreos para construír vivenda pública, antepoñendo intereses partidistas aos intereses dos veciños que buscan un fogar”.
Verea insistiu en que o incremento da achega autonómica a Santiago “é unha mostra do compromiso real da Xunta coa cidade” e avanzou que espera que esa tendencia se consolide no proxecto orzamentario do vindeiro ano.
