A concelleira do Grupo Municipal Socialista de Santiago, Marta Abal, pediu este mércores ao Partido Popular e ao Goberno local, encabezado por Goretti Sanmartín, que “deixen de lado as pelexas políticas e se centren en traballar de verdade en políticas de vivenda pública”.
As declaracións prodúcense despois de que o Concello ofrecese á Xunta de Galicia a cesión de dúas novas parcelas municipais para destinalas en exclusiva a vivenda pública en réxime de aluguer. Trátase dos terreos UER5 do SUNP-5 (A Muíña) e PR4 do SUNP-4 (As Cancelas), cunha capacidade estimada para 62 e 18 vivendas, respectivamente.
O ofrecemento foi acompañado dunha proposta municipal para que a administración autonómica active un programa de investimento en adquisición e rehabilitación de inmobles destinados tamén a vivenda pública, co obxectivo de compensar a perda de patrimonio residencial da veciñanza compostelá. A conselleira de Vivenda e Planificación de Infraestruturas, María Martínez Allegue, respondeu pedindo ao Concello que ceda todas as parcelas “sen condicións”. Ademais destas dúas, o consistorio tramita a cesión doutros tres terreos á Xunta.
Neste contexto, Marta Abal criticou a “falta de actuación da Xunta, administración con competencias exclusivas en materia de vivenda”, e subliñou que “o PP non construíu en Santiago ningunha soa vivenda protexida nos últimos anos”.
A edil socialista tamén apelou á responsabilidade do Goberno local, ao que instou a “actuar con axilidade na cesión gratuíta das parcelas”, lembrando que “a demanda de vivenda de aluguer accesible non pode esperar”.
O PSOE de Santiago defende dúas condicións fundamentais: que todas as vivendas sexan de protección pública permanente e que a maioría se destinen a aluguer con prezos accesibles, de maneira que o custo mensual non supere o 30% do salario das persoas inquilinas.
“Santiago necesita colaboración e vontade política, non confrontación nin escusas”, concluíu Abal.
