O Pavillón Municipal de Esteiro, en Ferrol, foi escenario o pasado 11 de outubro do Campionato Galego Cadete de Karate, celebrado de forma conxunta co Campionato Júnior e Sub-21 II Copa Máster. Entre os participantes estivo o deportista da Escola de Karate Dokkodo, Raúl Rodríguez, que conseguiu subir ao podio tras acadar a medalla de bronce na modalidade de Kumite <57 kg.
O karateka do club amesán realizou unha competición moi completa, na que amosou unha notable evolución técnica e táctica, especialmente no control do combate e na toma de decisións. Despois de caer en semifinais nun enfrontamento moi igualado, Rodríguez impúxose con claridade no combate polo terceiro posto, garantindo así un novo éxito para o Dokkodo.
Tras este resultado, o deportista xa centra o seu adestramento nas vindeiras citas a nivel nacional, entre as que destaca o Campionato Princesa de Asturias, que se celebrará esta mesma fin de semana. O club destacou o esforzo e a constancia de Raúl Rodríguez, que continúa consolidándose como unha das promesas galegas do karate cadete.
