O Concello de Ames, a través da Concellaría de Obras e Servizos Básicos, vén de habilitar dúas novas parcelas de aparcadoiro público na rúa Castelao, no Milladoiro, cunha capacidade conxunta duns 300 vehículos. Unha delas entrou en funcionamento este martes, 14 de outubro, mentres que a segunda abrirá nos próximos días.
As novas áreas de estacionamento sitúanse nunha zona próxima á avenida de Rosalía de Castro e supoñen unha mellora significativa da oferta de prazas nesta localidade. Os traballos de acondicionamento consistiron na limpeza e achandamento do terreo, na reparación das fochancas e na colocación dunha capa de grava. Ao tratarse de parcelas privadas, o firme non pode ser asfaltado, mais o Concello dispón dunha cesión temporal grazas aos acordos asinados cos seus propietarios.
O concelleiro Gustavo Nieto destacou que “esta nova área de aparcadoiro dará servizo a un gran número de veciños e veciñas do Milladoiro” e subliñou que o goberno local continúa “traballando para abrir novos espazos de estacionamento nesta localidade”.
Con esta actuación, o Milladoiro suma xa máis de 300 novas prazas habilitadas nos últimos anos no parque empresarial, ademais das zonas de estacionamento próximas ao centro comercial Supercor, á Casa da Cultura e á Travesía do Porto.
O Concello de Ames tamén reforzou nos últimos meses a capacidade de aparcamento en Bertamiráns, coa apertura de tres novos espazos públicos situados na Travesía da Peregrina, na rúa do Cómaro —en fronte ao centro deportivo da Telleira— e na Travesía do Pedregal, preto do centro de saúde. En conxunto, estas áreas suman outras 300 prazas dispoñibles para a veciñanza.
