A deputada nacionalista Olalla Rodil será a protagonista do acto ‘Construír e comunicar un nosoutras: falar, loitar, transformar’, organizado polo Grupo de Acción Feminista do BNG de Compostela, que se celebrará este xoves 16 de outubro ás 19:00 na Casa Xohana Torres.
A sesión, enmarcada no programa de actividades impulsadas polas mulleres do BNG en Santiago, centrará o debate na transformación dos espazos sociais e políticos en espazos feministas. Rodil abordará tamén o chamado síndrome da impostora, unha realidade que, segundo explicou, continúa a afectar moitas mulleres que “sinten que ocupan lugares que non lles corresponden ou para os que non teñen capacidades abondas”.
A coordinadora do Grupo de Acción Feminista, Concha de la Fuente, destacou que esta actividade busca fomentar a reflexión e o diálogo sobre o papel das mulleres na sociedade actual. “Olalla Rodil é unha voz esencial para analizar a urxencia de máis feminismo e o avance do machismo nos últimos tempos, así como para defender dereitos básicos como o dereito ao aborto, que volve ser cuestionado”, sinalou.
Olalla Rodil, natural de Ribeira de Piquín (Lugo), é licenciada en Publicidade e Relacións Públicas pola Universidade de Vigo e máster en Estudos Internacionais pola USC. Activista no movemento feminista galego, forma parte da Executiva e do Consello Nacional do BNG e exerce como deputada no Parlamento de Galicia desde o ano 2016.
