A cidade de Santiago de Compostela acollerá entre o 20 e o 24 de outubro a XXIII edición do Festival Amal, unha cita consolidada do cinema euroárabe que este ano se desenvolverá baixo o lema ‘Todas somos Palestina’, en referencia ao conflito que afecta á poboación da Franxa de Gaza.
O presidente da Fundación Araguaney-Ponte de Culturas e director do festival, Ghaleb Jaber Martínez, presentou a programación nunha rolda de prensa na que tamén participaron o director xeral de Cultura da Xunta de Galicia, Anxo M. Lorenzo, e a concelleira de Capital Cultural do Concello de Santiago, Míriam Louzao.
Jaber Martínez, galego de ascendencia palestina, explicou que a selección deste ano está composta por cinco pezas do cinema palestino, escollidas co propósito de achegar ao público unha comprensión máis profunda do conflito. “A razón que fai fundamental o festival é o achegamento que fai, a través do cinema, unha linguaxe universal, entre novas culturas que moitas veces son inxustamente separadas”, afirmou.
O director salientou que, aínda que Amal adoita recoller distintas perspectivas dun mundo árabe “enorme e diverso”, nesta edición a organización sentiu “a obriga moral de centrar a mirada en Gaza”. As proxeccións incluirán tanto documentais como filmes de ficción, e contarán coa presenza de directores e actores convidados.
Con respecto ao recente cesamento do fogo entre Hamás e Israel, Jaber Martínez expresou o seu alivio por “que deixen de caer bombas”, aínda que advertiu que a “paz e a xustiza aínda non se albiscan”. “Estamos contentos con que as cousas se tranquilicen, e buscaremos un horizonte onde esa paz sexa posible para os nenos e nenas de Palestina”, engadiu.
A programación arrancará o luns 20 ás 20:00 no Teatro Principal coa proxección de This is Gaza, de Tom Besley, un documental sobre o cineasta palestino Yousef Hammash, cuxo fogar foi destruído durante o conflito.
O martes 21 exhibirase Janin, Jenin, de Mohammed Bakri, que revisita o campo de refuxiados de Jenin dúas décadas despois do seu primeiro filme homónimo.
O mércores 22, o público poderá ver The estafe that remains, de Elia Suleiman, unha ficción en catro episodios sobre a memoria e a vida dunha familia palestina tras a creación do Estado de Israel.
O xoves 23 será a quenda de Notes on displacement, de Khaled Jarrar, centrado na viaxe dunha muller palestina que, tras ser desprazada de Damasco, tenta chegar a Europa pola ruta dos Balcáns.
Finalmente, o venres 24, The Encampments, de Kei Pritsker e Michael T. Workman, pechará o festival cunha ollada ás protestas estudantís de 2024 en solidariedade con Palestina.
