Decenas de persoas participaron na mañá deste sábado nunha protesta en Santiago de Compostela para clamar contra o sacrifico de tres cans no refuxio de Bando. O pasado martes, o padroado da Fundación Refuxio de Bando decidiu seguir as recomendacións dos informes de veterinaria que recomendan o sacrificio para tres cans perigosos, entre eles o que estivo implicado no ataque a un traballador a semana pasada.
Esta decisión provocou que se abrise unha recollida de firmas a través de Change.org para pedir salvar a Gosu, Krenchy e Kayser. Leva máis de 2.700 rúbricas de apoio. Na protesta deste sábado podíanse ler carteis como ‘Non sacrificio, si rehabilitación’ ou ‘Necesitan educación, non unha inxección’, ademais de cánticos como ‘Non é eutanasia, é asasinato’. Pola súa banda, o concelleiro popular Adrián Vila, que participou nesta mobilización, defende que o PP de Santiago “foi o único partido que non votou a favor do sacrificio”. Reponsabiliza á alcaldesa, Goretti Sanmartín, da “caótica situación” no refuxio de Bando.
