A Xunta de Galicia e a Universidade de Santiago de Compostela cooperarán para detectar drogas nas augas residuais nas depuradoras de Ourense, Pontevedra, Lugo, Santiago de Compostela e Guillarei (Tui) e así identificar patróns de consumo e novas sustancias. O obxectivo final é adaptar as políticas sanitarias para contribuír a mellorar a saúde dos galegos. O conselleiro de Sanidade, Antonio Gómez Caamaño, a conselleira de Medio Ambiente e Cambio Climático, Ángeles Vázquez, e o reitor da USC, Antonio López, asinaron este venres un convenio colaborador para levar a cabo a iniciativa.
Tal e como sinalou Gómez Caamaño, trátase dun proxecto “pioneiro” que “reafirma” o compromiso do Executivo galego coa loita contra as drogas como un problema social e de saúde pública. Apuntou que queren abordar esta problemática desde unha perspectiva “integral”, axudando ás persoas con adicción e ás súas familias, facilitando a recuperación da súa saúde e a súa reinserción social e laboral e, sobre todo, “incidindo na prevención como o camiño máis eficaz”. Pola súa banda, a conselleira de Medio Ambiente e Cambio Climático, Ángeles Vázquez, reiterou a relevancia da colaboración entre os departamentos autonómicos e a Universidade de Santiago e tamén puxo o foco en como a obtención desta información servirá para tomar decisións.
O convenio permitirá medir a presenza dunhas 10 sustancias, entre elas, cocaína, cannabis e fentanilo, mediante a análise de augas residuais, con cinco puntos de medición, escollendo as depuradoras sobre a base do tamaño da poboación á que prestan servizo, permitindo obter información das distintas provincias galegas. Establécese así, explicou o conselleiro, unha nova rede ‘sentinela’ de saúde pública que será capaz de detectar o aumento destas sustancias, así como novos patróns de consumo ou a entrada de novas drogas, o que permitirá anticiparse para adecuar as políticas sanitarias e preventivas.
RECOLLIDA DE MOSTRAS
A iniciativa conta cun investimento autonómico de 50.000 euros, cos que se financiarán as investigacións e difundirase a información sobre recursos, medios e outros programas de interese. En función dos resultados, estudarase a posibilidade de incorporar outras estacións depuradoras para darlle continuidade a esta medida. Tal e como indicaron, durante o mes de maio xa se recolleron mostras nas estacións depuradoras de Santiago de Compostela, Ourense, Lugo e Guillarei, e a intención é avanzar nunha segunda toma incluíndo a estación de Pontevedra, co obxectivo de elaborar un informe antes de fin de ano.
