Os traballadores de Ryanair no aeroporto de Santiago-Rosalía de Castro irán á folga o luns 20 de outubro, en resposta ao expediente de regulación de emprego (ERE) anunciado pola compañía aérea. Así o confirmou a delegada da CIG e membro do comité de empresa, Yolanda Carnota, quen explicou que a convocatoria foi rexistrada este mércores.
Segundo datos achegados pola central sindical, máis dun centenar de persoas participaron este xoves nunha concentración na terminal compostelá para amosar o seu rexeitamento ao axuste de persoal previsto pola aeroliña. Durante a mobilización, os empregados denunciaron a política laboral da empresa e reclamaron garantías de mantemento dos postos de traballo.
A folga terá carácter xeral para o persoal de Ryanair, mentres que noutros servizos do aeroporto e nas empresas próximas, como aparcamientos e compañías de alugueiro de vehículos, a convocatoria será parcial, de 12:00 a 15:00.
A CIG advirte de que esta será “a primeira dunha serie de accións” se a dirección da compañía non retira o ERE e non se abre un diálogo real cos representantes dos traballadores.
