O arcebispo de Santiago de Compostela, Francisco Prieto, asinou en Dallas (Estados Unidos) un acordo co Meadows Museum para expor neste centro de Texas pezas da Catedral compostelá nunha gran mostra en 2027.
Este acordo é continuación do asinado o pasado 25 de setembro en Santiago, segundo explica a Catedral de Santiago nun comunicado.
Xunto ao Arcebispo atópanse en Dallas o deán da Catedral, Manuel Jesús Formoso, o director da Fundación Catedral de Santiago, Daniel Lorenzo, e o director técnico do Museo Catedral de Santiago, Ramón Yzquierdo.
Entre outras iniciativas, este acordo permitirá expor no Meadows Museum unha ampla selección de importantes pezas artísticas conservadas na Catedral de Santiago, como parte dunha gran exposición que se organizará en entre febreiro e maio de 2027, Ano Santo Compostelán.
O Museo Meadows de Dallas, que este ano celebra o seu 60 aniversario, é o principal museo de arte española en EE.UU. Segundo os organizadores da mostra, a selección reunirá “ao redor de 70 pezas, entre restos arqueolóxicos, esculturas, pinturas, manuscritos e obxectos documentais”.
