A Universidade de Santiago de Compostela consolídase como a primeira institución académica do Estado en participación en proxectos de voluntariado, segundo o XIII Estudo sobre Voluntariado Universitario promovido pola Fundación Mutua Madrileña. No curso 2024-2025 tomaron parte nestas iniciativas 4.917 estudantes, o que supón un incremento do 56% respecto ao ano anterior.
A maioría dos participantes pertencen á área de Ciencias Sociais e Xurídicas, e colaboraron en 192 proxectos solidarios, a maior parte deles de entre tres e seis meses de duración. Estas accións desenvolvéronse integramente en España e tiveron como destinatarios principais a infancia vulnerable e os colectivos en risco de exclusión social.
Segundo o informe, o 95% dos proxectos da USC realizáronse en colaboración con entidades sociais, un dato que, segundo a Fundación, reflicte o “papel estratéxico das organizacións sen ánimo de lucro na mobilización solidaria da xuventude universitaria”.
A tendencia ascendente do voluntariado universitario non se limita a Santiago. No conxunto do Estado, seis de cada dez universidades incrementaron as súas accións durante o último curso, ata sumar 2.900 iniciativas, das que o 73% se desenvolveron xunto a ONG. Esta cooperación, sinala o estudo, multiplica o impacto social e favorece tanto o desenvolvemento persoal do alumnado como o fortalecemento das propias entidades.
O informe, elaborado a partir da participación de 42 universidades públicas e privadas e 107 organizacións sociais, tamén debuxa o perfil medio do voluntariado universitario: o 75% son mulleres, dedican entre dúas e catro horas semanais ás actividades e participan movidas por “un compromiso real coas causas sociais e pola aprendizaxe persoal e profesional que estas experiencias lles achegan”.
