Os catro edís non adscritos do Concello de Santiago —Mercedes Rosón, Gonzalo Muíños, Milagres Castro e Marta Álvarez— reafirmaron a súa negativa a facilitar a chegada do Partido Popular á Alcaldía compostelá. Nun comunicado conxunto, advertiron que “só apoiarían unha moción de censura na que Mercedes Rosón fose candidata”, descartando calquera acordo que situase ao popular Borja Verea á fronte do Goberno local.
“Nós temos un contrato asinado coas persoas que nos votaron, que é o noso programa electoral, e está nas antípodas do programa do señor Verea”, sinalaron. O concelleiro Gonzalo Muíños engadiu que, “por coherencia coa palabra dada”, a única alternativa que considerarían sería unha moción encabezada por Rosón, á que definiu como “a única candidata posible das non adscritas ao actual goberno municipal”.
Muíños cualificou de “incomprensible” o “esforzo estéril dalgunhas persoas por insuflar” o debate sobre unha posible moción de censura, un asunto que, ao seu xuízo, “está superado desde hai tempo”. Defendeu que o grupo de non adscritos “non se sente interpelado” e que a cidadanía “o que quere é que traballemos para mellorar os servizos públicos, impulsar proxectos e exercer unha oposición esixente, pero útil e construtiva”.
Aínda que recoñece que o goberno de Goretti Sanmartín “peca de soberbia vista a deficiente xestión”, Muíños deixou claro que o seu grupo “non vai entrar en debates de cadeiras nin de brazos”. “Queremos falar de vivenda, de servizos públicos e de investimentos nos barrios e parroquias; o resto deixámosllo a outros”, afirmou.
O PSOE REXEITA ENTRAR “EN MÁIS ENREDOS”
Pola súa banda, o portavoz do PSOE no Concello, Gumersindo Guinarte, rexeitou este venres “entrar en máis enredos” ao ser preguntado pola situación. Xunto á concelleira Marta Abal, insistiu en que os socialistas non participarán en ningunha moción de censura que derive nun goberno do Partido Popular.
“Estamos na oposición, facendo unha oposición construtiva, pero entre iso e favorecer un goberno do PP hai un abismo”, concluíu Guinarte.
