O Grupo Municipal Socialista de Santiago advertiu esta semana do “desmantelamento do servizo de actividades socioculturais do Concello”, que, segundo denunciou a concelleira Marta Abal, deixou sen cobertura a boa parte das programacións que se desenvolvían tanto nos barrios da cidade como nas parroquias do rural.
Abal explicou que a situación se agravou “dende o 1 de outubro”, cando moitas das actividades quedaron sen persoal monitor. No caso do Centro Sociocultural de Santa Marta, concretou, 78 persoas quedaron sen as súas clases, mentres que en instalacións do rural, como o centro da Gracia, o servizo “deixou de prestarse por completo”.
A edil socialista cualificou esta situación de “inaceptable” e criticou que o Goberno Local “abandone ás persoas usuarias que xa pagaron polas actividades e que, malia iso, non están a recibir o servizo comprometido”. Para Abal, trátase dunha “clara vulneración dos dereitos da cidadanía” e dunha mostra da “incapacidade do Executivo municipal para garantir o cumprimento do contrato e asegurar un servizo público de calidade”.
O PSOE compostelán pide explicacións inmediatas ao Goberno Local, así como a reposición urxente do servizo e a adopción de “medidas firmes para que se respecte a cidadanía e se cumpra o contratado”. O grupo socialista lembra ademais que estas actividades teñen unha alta participación veciñal e unha función esencial na dinamización comunitaria dos centros sociais da cidade.
