O Consello da Cultura Galega (CCG) e a Universidade de Santiago de Compostela (USC) veñen de presentar unha nova entrega da serie divulgativa Proxector, un proxecto conxunto que ten como obxectivo achegar recursos didácticos en galego e fomentar o interese social pola ciencia e a tecnoloxía.
Coincidindo coa celebración do Día da Ciencia en Galicia, o número deste mes leva por título ‘A investigación química aplicada ao desenvolvemento industrial’ e aborda a relevancia da química como motor da innovación tecnolóxica e do progreso económico sustentable.
A publicación está inspirada na figura de Fernando Calvet i Prats (1903–1988), o científico homenaxeado este ano pola Real Academia Galega de Ciencias, recoñecido como introductor da bioquímica moderna en España e referente da química orgánica en Galicia. O monográfico salienta a súa contribución á aplicación práctica da investigación química nos sectores industriais, un ámbito no que foi pioneiro desde a súa etapa na Universidade de Santiago e, posteriormente, nos laboratorios Zeltia do Porriño.
Con esta nova entrega, Proxector reafirma o seu compromiso coa divulgación científica en lingua galega, promovendo materiais accesibles e de calidade para o profesorado, o alumnado e o conxunto da sociedade, ao tempo que pon en valor o legado de figuras clave da ciencia galega contemporánea.
