O Consello Superior de Investigacións Científicas (CSIC) en Galicia incrementa o seu persoal na Escala de Persoal Científico Titular de Organismos Públicos de Investigación coa incorporación de tres persoas polo sistema de promoción interna en Santiago e Vigo: Elena Corredoira Castro, David Barreiro Martínez e Camilo Saavedra Penas. A adxudicación de destino, xa publicada no Boletín Oficial do Estado (BOE), e a correspondente toma de posesión foi na Misión Biolóxica de Galicia (MBG, sede Santiago de Compostela), o Instituto de Ciencias do Patrimonio (Incipit, Santiago de Compostela) e o Centro Oceanográfico de Vigo (COV) do Instituto Español de Oceanografía (IEO).
Elena Corredoira Castro é licenciada (1995) e doutora (2002) en Ciencias Biolóxicas pola Universidade de Santiago de Compostela. Desde 1997 está vinculada á actual sede da MBG en Santiago. Desde 2004 é funcionaria de carreira. Neste tempo desenvolveu un labor científico-técnica no grupo de Biotecnoloxía e Mellora Forestal, centrándose fundamentalmente na mellora, desenvolvemento e conservación das especies forestais predominantes nos principais sistemas agroforestais da península Ibérica mediante a aplicación de ferramentas biotecnolóxicas baseadas no cultivo in vitro de tecidos vexetais. Desde 2020, é a responsable da Unidade Técnica de Biotecnoloxía e Mellora Forestal do MBG, cuxa labor se centra na aplicación destas ferramentas biotecnolóxicas avanzadas para mellorar, propagar e conservar especies forestais clave das dehesas –a aciñeira e o alcornoque–, así como de especies autóctonas galegas como o castiñeiro.
David Barreiro Martínez é licenciado en Xeografía e Historia coas especialidades de Prehistoria e Arqueoloxía (1994) e Xeografía Aplicada (1997) e doutor (2005) en Historia pola Universidade de Santiago de Compostela. Está vinculado ao Incipit desde a creación do instituto, en 2010, tras pertencer ao Laboratorio de Patrimonio do IEGPS. Desde 2006 é funcionario de carreira. Desenvolveu o seu labor na xestión do patrimonio arqueolóxico, con investigacións encamiñadas ao deseño de ferramentas metodolóxicas para a avaliación de impacto. Posteriormente, ampliou o seu traballo á xestión do patrimonio cultural en xeral, incluíndo o estudo dos procesos de valorización e socialización do patrimonio e as paisaxes culturais. Actualmente, a principal actividade de Barreiro combina a investigación en valorización do patrimonio cultural coa coordinación da Unidade de Valorización do Incipit. Os seus intereses de investigación relaciónanse cos modos de acceso, produción, xestión, valorización e uso do patrimonio cultural.
Camilo Saavedra Penas é licenciado (2009) en Bioloxía Mariña e doutor (2017) en Ciencias Mariñas, Tecnoloxía e Xestión polo Campus Do Mar-Universidade de Vigo. Máster en Economía, Avaliación e Xestión dos Recursos Mariños e Pesqueiros (2011) e Experto Universitario en Métodos Avanzados de Estatística Aplicada (2013). Desde o 2012 está vinculado ao IEO. Desde 2020 é funcionario de carreira e dirixe o Equipo de Mamíferos Mariños do IEO-CSIC desde COV e desenvolve o seu labor no grupo de investigación de Megafauna Mariña (MegaMAR). É responsable da monitorización e avaliación dos mamíferos mariños a nivel nacional para o cumprimento do Directiva Marco sobre a Estratexia Mariña por encargo do Miteco, representante nacional en diversos foros internacionais e coordinador do grupo nacional de especialistas de mamíferos mariños da IUCN, así como asesor do Ministerio na Comisión Baleeira Internacional. Desenvolve a súa liña de investigación acerca dos estudos de abundancia de cetáceos, captura accidental e estudos de bioloxía poboacional e ecoloxía molecular, mediante a recollida e análise de mostras de animais varados, capturados ou en liberdade.
