A Semana do Libro de Compostela (SELIC) abriu este venres 3 de outubro a súa edición de 2025, que se estenderá durante dez xornadas na praza da Quintana. A feira aposta este ano por situar no centro á comunidade lectora e a socialización arredor do libro, cun programa que combina presentacións, roteiros, recitais, concertos e obradoiros.
No acto inaugural, a alcaldesa Goretti Sanmartín destacou que “esta SELIC de outono está tomando as prazas”, ligando a programación coa memoria histórica da Quintana como escenario de actos literarios, políticos e culturais. Recordou episodios como a presenza do Batallón Literario en 1808, a foto de Federico García Lorca en 1932 ou as mobilizacións sociais que acolleu a praza, conectándoos cos roteiros e actividades previstas para os próximos días. A rexedora anunciou tamén que o domingo 5 non haberá programación en solidariedade co pobo palestino, coincidindo coa mobilización convocada pola Coordinadora Galega de Solidariedade con Palestina.
Entre as citas máis destacadas figura a presentación do libro gañador do Premio Selic 2025, ‘Sarela’ de Marga Tojo, o sábado 4 ás 13:00, nun encontro con Quico Cadaval e Paco Macías. O programa inclúe ademais roteiros pola Compostela de Roberto Vidal Bolaño, a Revolución de 1846 da man de Xurxo Martínez, a cidade de Lorca con Henrique Alvarellos ou a Compostela de Wharton e Hemingway guiada por Irmás Cartoné.
A carpa instalada na Quintana reúne este ano a editoras como Através, Hugin e Munin, Irmás Cartoné, Alvarellos ou Cuarto de Inverno, librarías como Lila de Lilith, Pedreira e Numax, ademais de bibliotecas e institucións culturais como o Consorcio de Santiago, a USC e o Colexio de Arquitectos de Galicia.
O cartel de participantes inclúe voces diversas, como Andrea Nunes Brións, Eli Ríos, Gemma Ruiz Palà, Teresa Moure, Faia Díaz, Eva Veiga ou Bob Pop, e combina literatura, música e creación colectiva. Todas as actividades son de entrada libre, con posibilidade de inscrición no momento para os obradoiros e paseos.
A organización subliña que a SELIC procura crear un espazo de intercambio e conversa arredor do libro entendido como hábito praceroso e tamén como ferramenta para a memoria e a reflexión social. A intención do Concello é prolongar o espírito da feira máis aló dos dez días, con accións educativas en centros de ensino, edición dun catálogo das obras participantes e materiais para fomentar a lectura desde a infancia ata a idade adulta.
