O catedrátido de Historia da arte pola Universidade da Coruña (UdC) Ramón Yzquierdo Perrín, experto na Catedral de Santiago e arte medieval, faleceu este xoves aos 77 anos.
Este académico da Real Academia de Belas Artes de Galicia foi director técnico do Museo da Catedral de Santiago de Compostela, con traballos sobre arquitectura románica ou a reconstrución do coro pétreo do Mestre Mateo xunto ao profesor Ramón Otero Túñez. A súa investigación céntrase no románico e o protogótico.
Licenciado en Filosofía e Letras –sección de Historia pola Universidade de Santiago de Compostela en 1970–, entre 1970 e 1995 formou parte do Departamento de Historia da arte da USC. En 1995 trasladouse como catedrático á Universidade da Coruña, con docencia nos Campus de Ferrol e A Coruña.
Pertenceu á Real Academia de Belas Artes de San Fernando de Madrid e ao Plenario do Consello da Cultura Galega, entre outros.
Comisariou exposicións, organizou e participou en congresos e reunións científicas internacionais, nacionais e doutra índole, ademais de participar en recuperacións de patrimonio. Conta con numerosas publicacións.
Este venres, ás 12:00 horas, celebrarase unha misa na capela da Funeraria Apóstolo Santiago. Tras iso, recibirá sepultura no compostelán cemiterio de Boisaca.
