A conselleira de Política Social e Igualdade, Fabiola García, avanzou que o Goberno central trasladará de forma “inminente” a 15 menores migrantes a Santiago e afeou que se faga “pola porta de atrás”. Tal e como trasladou García en declaracións difundidas aos medios, tivo coñecemento “de forma extraoficial” da chegada destes menores, que se suman aos 15 que chegaron á Coruña a semana pasada.
Neste contexto, tamén apuntou que a Xunta recibiu catro novos expedientes de menores estranxeiros, polo que xa contan cun total de 24 expedientes dos 317 que “Pedro Sánchez e Puigdemont pactaron enviar a Galicia”. A continuación, denunciou unha vez máis que “hai moitos outros menores” que o Goberno central está a enviar a Galicia “pola porta de atrás”.
Previsiblemente, os menores instalaranse no centro de Monforte cando este sexa reparado dos danos causados polos cócteles molotov cos que foi atacado fai unhas dúas semanas. Polo momento, non hai información concreta para a finalización das obras nin para a chegada dos migrantes.
